नाशिकमध्ये २४ तासांत पडली ९९ रुग्णांची भर

म. टा. खास प्रतिनिधी, नाशिक

शहरात गेल्या २४ तासांत नवीन ९९ करोनाबाधित रुग्णांची भर पडली असून, एकाच दिवसात ९० पेक्षा अधिक रुग्ण आढळून येण्याची ही पहिलीच वेळ आहे. शहरातील रुग्णसंख्येने मालेगावलाही मागे टाकले असून, एकूण मृत्यूचा आकडासुद्धा पन्नासच्या घरात पोहचला आहे. करोना हॉटस्पॉट ठरणे शहरवासीयांसह प्रशासनाच्या चिंतेत भर टाकणारी बाब ठरली आहे.

लॉकडाउन शिथिल केल्यापासून करोनाचा वाढता उद्रेक तापदायक बनला आहे. जुने नाशिक, पंचवटी, वडाळा नाका ते वडाळगाव या भागात करोनाने उच्छाद मांडला आहे. अवघ्या १५ दिवसांपूर्वी करोना फैलावामुळे मालेगावाबाबत चिंता व्यक्त करणारे शहरवासीय आता करोनाच्या पुरत्या कचाट्यात सापडले आहेत. आजमितीस मालेगावमधील करोनाची रुग्णसंख्या ९०३ आहे, तर नाशिक शहरात करोनाग्रस्त नागरिकांची संख्या ९६० झाली आहे. गुरुवारी दिवसभरात महापालिकेच्या दवाखान्यांत ८७ नवीन संशयित रुग्ण दाखल करण्यात आले असून, सध्या ३२९ पॉझिटिव्ह रुग्णांवर उपचार सुरू आहेत. प्रलंबित अहवालांची संख्याही ५०५ झाली आहे.

नाशिक महापालिका चौथ्या स्थानी

दाखल रुग्ण पूर्ण बरे करण्यात मालेगाव महापालिका अव्वल स्थानी असून, ९०३ पैकी ७६९ म्हणजे ८५ टक्के रुग्ण बरे करण्यात महापालिका यशस्वी झाली आहे. नाशिक ग्रामीणमध्ये हे प्रमाण ५६ टक्के, जिल्हा बाह्यत ७३, तर नाशिक महापालिका हद्दीत हे प्रमाण अवघे ४५ टक्के आहे. नाशिक महापालिका हद्दीत आतापर्यंत सापडलेल्या ८९७ रुग्णांपैकी ४०४ रुग्ण बरे झाले आहेत. रुग्ण बरे होण्याची कमी टक्केवारी आणि त्यात नव्याने सापडणारे रुग्ण हेच महापालिका आरोग्य विभागापुढील सर्वात मोठे आव्हान ठरले आहे.

शहरासह जिल्ह्यात पाच मृत्यू

मालेगावमध्ये करोना नियंत्रणात आला असला, तरी त्याचा प्रसार थांबलेला नाही. दिवसभरात मालेगावमध्ये १४ संशयित आढळून आले. येवला, नांदगाव, चांदवड, सिन्नर, दिंडोरी, घोटी, इगतपुरी, पिंपळगाव बसवंत अशा वेगवेगळ्या तालुक्यांमध्ये १८ रुग्ण सापडले. शहर, जिल्हा आणि जिल्हाबाह्य अशा पाच जणांच्या मृत्यूची नोंद गत २४ तासांत झाली. त्यात जुना आडगाव परिसरातील टाकळीनगर येथील गणेशवाडीतील ७० वर्षांच्या वृद्धाचा, गंजमाळ येथील ६० वर्षांच्या वृद्धेचा, मालेगावातील ५५ आणि २९ वर्षांच्या महिलेचा, तसेच मूळ जळगाव जिल्ह्यातील धारणगाव येथील ४२ वर्षांच्या व्यक्तीचा समावेश आहे.

तेव्हा मालेगावला विरोध आता काय?

मालेगावमध्ये करोनाचा फैलाव झपाट्याने झाला त्यावेळी राजकीय मंचही गरम झाला होता. नाशिक शहरासह धुळे आणि इतर ठिकाणीसुद्धा मालेगावमधील रुग्णांना उपचारांसाठी दाखल करून घेण्यास नकार देण्यात आला. यात सरळ पक्षीय आरोप-प्रत्यारोप होत गेले. आता उलट परिस्थिती असून, मालेगावपेक्षाही भीषण परिस्थिती नाशिक शहरात निर्माण झाली आहे. राजकीय पक्षांसह प्रशासनाने याकडे गांभीर्याने पाहण्याची गरज असल्याचे मत तज्ज्ञांकडून व्यक्त होते आहे.

Source

Spread the love

Related posts

Leave a Comment